أجمل وأنقى وأبسط الكلمات المعبرة أختارتها العروس العراقية

أمنية فتاة عراقية

اني بنية عراقية ..صبية جميلة بغدادية .. حلوة ؟ اكيد حلوة .. لأن ماكو عراقية ما تملي البيت والعين .. احلم مثل كل البنات .. لا مو مثل كل البنات .. لأني عراقية .. والعراقية ماتشبه اي البنات .. احلم بعريس زين يحمل هواية صفات .. هي صفات بسيطة .. بس كلش مهمة الي كعراقية ؟؟بأختصار اني عروس الها شروط ومتطلبات .. واعتقد هذا مو هواية علية .. لأن باختصار اني عراقية ..

احلم بعريس يحبني اكثر من كل البنات .. واكثر من حوريات السماوات ؟؟ أحلم بعريس مثقف وانيق .. مو لابس بجامة ونعال ومتطوع بالمليشيات .. احلم بعريس ماينتمي لأي حزب او هيئة او تيار .. اريده ينتمي بس لأرض العراق ..احلم بعريس مدرس .. مهندس .. عامل .. بس ماريده بعد دكتور .. احلم بأديب .. شاعر .. كاتب .. بس لا يكتب عن الديمقراطية والأنتخابات .. ولا يكتب عن الاحزاب والفيدرالية ..

اريد بيت على شواطئ الاعظمية .. والذهب من سوق الكاظمية .. اريد بحنة البصرة انقش ايدية .. وبخلاخل الموصل ازين رجلية .. اريد عريس اهله من المذهبين .. واصدقائه تركمان وجيرانه مسيحيين .. وهمينة اكراد وصابئة ويزيديين .. اريد بعرسي تدك فرقة العلم .. وتغني لندا جورج جميلة الكلد والاشوريين ..

اريد عريس يلبس بالعرس قاط واحلى رباط .. ولا يكلي الرباط مو عادتنا .. لأن اني عروسة عراقية مو فارسية ..يلبس دشداشة همينة ميخالف .. بس لا يكصرها عبالك ينافس صبايا لبنان .. لأن اني عروسة عراقية مو سعودية .. اريد اني البس فستان ابيض جميل .. .. لأن اني عروسة عراقية .. اريد عرسي يكون عرس عراقي .. مغني وهلاهل وفرح ولا يعزل الجنسين ويكول عرس وزفة شرعية .. لأني اني عروسة عراقية مو يمانية ..

اريد شهر عسل بجبال دهوك ومصايف السليمانية .. بس ليفرشولي سجادة حمرة ويستقبلوني بحرس وفرقة استعراض عسكرية .. لأن اني مثلهم عراقية .. اقصد همة مثلنا عراقيين !!!

اتمنى الله يرزقني بأولاد وبنات حلوين من يسألوني : ماما أحنا سنة لو شيعة .. مسلمين لو مسيحيين .. اكراد لو تركمان .. صابئة لو يزيديين .. أضربهم على حلكهم واكوللهم أنجبوا .. العفو .. نسيت احنا ببلد ديمقراطي .. العنف والسلاح هو ضد القانون .. راح احضنهم بكل حب وحنان واكوللهم (اكسكيوز مي ماي جلدرن) انتو عراقيين وبس ؟؟؟ وهذا هو المهم ...

وصدكوني هذا حلم كل بنية عراقية !

عاشت ايدج

تسلم
واشكرك على المرور الحلوووووو

هههههههههههه احلى شي ضحكني هو اكسكيوز مي

اني هم عجبتني "اكسكيوزمي ماي جلدرن" اشكرج على مرورج

احلى كلمه اني عراقيه اشكرك على دعوتك الحلوه ومن صدوك العراقيه تستاهل اتعيش احسن حياه لان اشوف العراقيه اكثر وحده تصبر بين نسوان الدنيا كولهم واشكرك امير بغداد على مرورك ويارب انت هم تتوفق بحياتك العلميه والعمليه

هههه موضوع حلو عاشت ايدج مريم

هههه موضوع حلو عاشت ايدج مريم ان شاء الله تتحقق امنياتج وامنيات كل البنات

تسلمين حبيبتي نور الشمس الله يحقق كل امنيات الناس امين يارب العالمين